Rev 16 | MMX | STEP | La nia aga ronga laxaka linga silok ga vaase su boro xeneng at loogu laplavang, la ga lok ti mo lavanuti lubungangelo xeretna, “Minat pas la mina soli asu lebelemamao at ne Moroa i nemen keneng at nom lavanuti leventingtigon to at lavatbung menemen.”

aAis 49:26

Revelation of John 16

Lavanuti Leventingtigon At Lebelemamao At Ne Moroa

1 La nia aga ronga laxaka linga silok ga vaase su boro xeneng at loogu laplavang, la ga lok ti mo lavanuti lubungangelo xeretna, “Minat pas la mina soli asu lebelemamao at ne Moroa i nemen keneng at nom lavanuti leventingtigon to at lavatbung menemen.”

2 La laangelo avot gat pas la ga soli asu mo lebelemamao ri limixin at na lavatbung menemen. La lemparabi silok gang songot aleng, ga vot saparap mo limixin diga ruuna loklok katling ap mo lavatpanga sio la diga lotu parap lavatpoovo vanga ren.

3 La laangelo sepsev agepura ga soli asu lebelemamao at ne Moroa ri laras la laras ga ravasu ngan ta lada at laradi i met, la lempanga axap at lebelen laras ga met.

4 La laangelo sepsev avantun ga soli asu mo lebelemamao at ne Moroa ti laradan silok la levempuvut dan bok, la diga ravasu ngan lada. 5 La aga ronga laangelo ik lok tatao laradan ga lok ti ne Moroa,

“Lodoxoma ram ti lok li na losongsongot ura lok li vam i at lavatbung menemen ik mokso aleng. Kuren la ne Moroa, nenu u melemelengan lingina la gano bok, 6 mila nedi limixin kapmek diga sev amet limixin nuunu eburu mi lavaeme vapaase alii ram, kuren la ura raba nedi limixin kapmek mi lada kusu nedi dina in i, la ik mokso aleng do nedi limixin kapmek dina in mo lada.” ^a

7 La melemu aga ronga lempapaase boro at loxonin laplavang ga lok keretna,

“I ruturun aleng. Nenu ne Moroa, Leeme Silok, u lolos aleng. La lodoxoma ram ti lox asuusu mo levesongsongot, ik mokso la i epovo rinotno at loklok, mo limixin diga lox i.”
8 La laangelo sepsev avanuet ga soli asu lebelemamao at ne Moroa ro at laxangking. La laxangking ga lok kaka lololos kusu nan bonbo limixin mi liplivi silok teren. 9 La laxangking gan bonbo nedi, la diga paase aksaksa ri laasen at ne Moroa, mo i ruuna lololos mavana at nom levesongsongot. Ketla nom limixin di goxo para rinotno xusu dina leeng basinge laxapmek atdi la dina emi asu mi ne Moroa.

10 La laangelo sepsev avalimo ga soli asu manga lebelemamao at ne Moroa ro at loxot kitkis at lavatpanga sio, la mo lixitkis teren ga nemen at lamain bonot, la limixin diga atat aleng leven gam atdi mumu losongsongot silok atdi. 11 La diga paase aksaksa ri ne Moroa no vana at laxalibet mumu losongsongot la laxanabi atdi, ketla di goxo para rinotno xusu dina leeng basinge mo laxapmek diga lox i.

12 La laangelo sepsev avanna ga soli asu lebelemamao at ne Moroa to at ladan silok Iupretis. La mo ladan ga mes axap, kusu ri lox agagas li langas ti lavaorong silok boro at lenep laxangking i soosoo su e. 13 La nia aga ven lavantun lubunggas ga milik ngan laxarokrok, lara ga sixisu boro at lungusno at lavattulaava, la lara boro at lungusno at lavatpanga sio, la lara boro at lungusno at laradi vapaase alii xaxarang. 14 Nedi na leventoonan at lubunggas di ruuna lololos kusu dinak lok lempanga sangsangu. La diga epeseves ti lavatbung menemen axap, kusu dina lok bubua ka lavaorong silok eburu mi limixin esep atdi ri mo leesep ba vot ap mo langsangan laaleng silok at ne Moroa i lolos aleng.

15 La ne Iesu ga lok keretna, “Nia aba vot ngan laradi xipkip pilo. Luvukat ti mo lara i gagas amisik la ik lok gagas nunuan lisingsigaara ren kusu neni noxo lok beleben la noxo lok mamangan.”

16 La mo leventoonan kapmek diga lok bubua ka lavaorong silok to at lemenemen laasen teren at lavapaase Ibru do ‘Amagedon.’

17 La laangelo sepsev avanuti ga soli asu lebelemamao at ne Moroa ti lamavangkap, la langsangan lavapaase silok ga ravasu boro at loxonin orong, mo ik lok keneng at loogu laplavang; ga lok keretna, “Ira xap ta.” 18 La lavanga ga mam etitit ga vot, la leretepaavat boro vana at laxalibet ga tit la langsangan langne silok ga vot. La goxovisi tangne silok kerepmo ga vot, ga ru ka i at luruntudum li at limixin, la mo langne ni ga lok kapmek aleng. 19 La mo lemenemen silok ga epeseves ti lavantun levengkot la mo levenmenemen silok at na lavatbung menemen ga rem utut axap. La ne Moroa ga doma asu laxapmek at limixin to at lemenemen silok, Babilon, la neni ga lox asuusu lebelemamao silok teren ti mo limixin. 20 La levesoxan axap mi lempattavut diga sonao. 21 La langsangan larakabu ga vot la lengkos teren ga lok ngan lemparuat la lumumuat teren ga epovo at lavanuet sangaun mi lavalimo leven kilogerem, la ga subu at limixin, la diga paase aksaksa ri ne Moroa mila losongsongot at na lavatakabu ga lok kapmek aleng.